ܒܝܗܒ̣ܐ ܝܘܢ ܩܬܝ ܚܝ̈ܐ ܕܠܐܒܕ: ܘܠܐ ܬܠܩܝ ܗܠ ܐܒܕ (ܝܘܚܢܢ ܝ: 28)

ܟܪܸܣܛܝܵܢܵܐ ܓܵܪܵܓ ܕܗܸܟ̃ ܠܵܐ ܚܵܫܸܒ̣ ܝܲܢ ܗܲܡܙܸܡ ܒܩܵܠܘܿܠܘܼܬܵܐ ܒܘܼܬ ܟܝܼܡ ܗܲܝܡܵܢܘܼܬܵܐ. ܐܸܢ ܚܲܕ݉ ܒܪܘܿܢܵܐ ܕܐܲܠܵܗܵܐ ܦܵܐܸܫ ܒܫܸܟ ܒܘܼܬ ܚܘܼܒܵܐ ܘܫܲܪܝܼܪܘܼܬܵܐ ܘܡܗܘܼܡܢܘܼܬܵܐ ܕܒܵܒܘܼܗܝ: ܪܵܒܵܐ ܟܹܐ ܡܲܟܪܸܒ ܠܹܗ. ܕܵܐܟ̣ܝܼ ܡܵܨܲܚ ܠܡܲܦܫܘܼܡܘܼܗܝ ܒܗ̇ܝ ܕܠܵܐ ܗܲܡܸܢܲܚ ܒܫܵܦܵܩܲܬܹܗ ܢܵܛܘܿܪܬܵܐ؟ ܟܪܸܣܛܝܵܢܵܐ! ܕܲܪܩܘܼܒ̣ܠ ܝܼܠܵܗ̇ ܠܟܠܵܝ ܩܵܘܠܹ̈ܐ ܕܗܸܡܸܙܡܵܢ ܩܲܕܝܼܫܬܵܐ ܕܐܲܠܵܗܵܐ ܕܐܲܢ݉ܬ ܦܵܝܫܸܬ ܡܘܼܢܫܝܼܵܐ ܝܲܢ ܕܦܵܝܫܸܬ ܫܒ̣ܝܼܩܵܐ ܠܸܬܠܵܩܵܐ. ܐܸܢ ܡܘܼܡܟܸܢ ܝܼܗ݉ܘܵܐ ܐܵܗܵܐ: ܕܵܐܟ̣ܝܼ ܒܸܬ ܗܵܘܹܐ ܫܲܪܝܼܪܵܐ ܗ̇ܘ ܕܐ݉ܡܝܼܪܵܐ ܝܠܹܗ: ܩܵܡܘܿ! ܟܹܐ ܡܲܢܫܝܼܵܐ ܒܲܟ̣ܬܵܐ ܨܲܒ̣ܝܼܘܼܗ̇: ܡ̣ܢ ܠܪܵܚܘܿܡܹܐ ܥܲܠ ܒܪܘܿܢܵܐ ܕܒܲܛܢܘܼܗ̇؟ ܐܘܼܦ ܐܲܢܹܐ ܡܲܢܫܝܼ: ܐܵܢܵܐ ܠܹܐ ܡܲܢܫܸܢܵܟ̣ܝ. ܡܘܼܕܝܼ ܒܸܬ ܗܵܘܹܐ ܗ݉ܘܵܐ ܦܵܝܕܵܐ ܕܗ̇ܘ ܩܵܘܠܵܐ: ܣܵܒܵܒ ܛܘܼܖ̈ܵܢܹܐ ܒܸܬ ܫܲܢܝܼ: ܘܖ̈ܘܼܡܝܵܬܹܐ ܓ̰ܵܘܓ̰ܝܼ: ܘܫܵܦܵܩܲܬܝܼ ܡ̣ܢ ܠܟܸܣܠܵܟ̣ܝ ܠܹܐ ܫܲܢܝܵܐ: ܘܩܵܘܠܵܐ ܕܫܠܵܡܝܼ ܠܹܐ ܓ̰ܵܘܸܓ̰: ܒܹܐܡܵܪܵܐ ܝܠܹܗ ܡܪܲܚܡܵܢܵܟ̣ܝ ܡܵܪܝܵܐ. ܐܲܝܟܵܐ ܒܸܬ ܗܵܘܝܵܐ ܗ݉ܘܵܐ ܣܲܪܲܣܬܘܼܬܵܐ ܕܗܸܡܸܙܡܵܢܹ̈ܐ ܕܡܫܝܼܚܵܐ ــ ܘܐܵܢܵܐ ܒܝܼܵܗܒ̣ܵܐ ܝܘܸܢ ܩܵܐ ܥܸܖ̈ܒܝܼ ܚܲܝܹ̈ܐ ܕܠܐܵܒܵܕ: ܘܠܹܐ ܬܵܠܩܝܼ ܗܲܠ ܐܵܒܵܕ: ܘܠܵܐ ܐ݉ܢܵܫܵܐ ܒܸܬ ܓ̰ܵܢܸܘ ܠܗ݉ܘܿܢ ܡ̣ܢ ܐܝܼܕܵܬܝܼ̈. ܐܲܝܟܵܐ ܒܸܬ ܗܵܘܹܐ ܗ݉ܘܵܐ ܝܘܼܠܦܵܢܹ̈ܐ ܕܫܵܦܵܩܲܬ؟ ܟܠܵܝ ܒܸܬ ܗܵܘܝܼ ܗ݉ܘܵܘ ܕܘܼܓܠܵܢܹ̈ܐ ܐܸܢ ܚܲܕ݉ ܡ̣ܢ ܒܢܘܿܢܹ̈ܐ ܕܐܲܠܵܗܵܐ ܬܵܠܸܩ ܗ݉ܘܵܐ. ܐܲܝܟܵܐ ܒܸܬ ܗܵܘܝܵܐ ܗ݉ܘܵܐ ܫܲܪܝܼܪܘܼܬܵܐ ܕܐܲܠܵܗܵܐ: ܐܝܼܩܵܪܘܼܗܝ: ܚܲܝܠܘܼܗܝ: ܫܵܦܵܩܲܬܘܼܗܝ: ܩܵܘܠܘܼ̈ܗܝ: ܡܵܘܡܵܬܘܼ̈ܗܝ: ܐܸܢ ܚܲܕ݉ ܡ̣ܢ ܐܲܢܹܐ ܕܩܵܬܵܝ ܡܝܼܬ ܠܹܗ ܡܫܝܼܚܵܐ ܘܕܡܘܼܬܒ̣ܹܐ ܝܗ݉ܘܵܘ ܗܹܒ̣ܝܼܵܝ ܒܝܼܘܼܗܝ: ܬܵܠܸܩ ܗ݉ܘܵܐ؟ ܪܲܦܝܼ ܐܵܢܝܼ ܙܕܘܼܥܝܵܬܹ̈ܐ ܕܟܝܼܡ ܗܲܝܡܵܢܘܼܬܵܐ ܡܲܝܬ݉ܝܵܢܹ̈ܐ ܕܠܵܘܡܵܐ ܠܫܸܡܵܐ ܕܐܲܠܵܗܵܐ. ܩܘܼܡ݉: ܢܦܘܿܨ ܬܵܘܙ ܡܸܢܘܼܟ̣ ܘܠܒ̣ܘܿܫ ܠܒ̣ܸܫܝܵܬܘܼ̈ܟ̣ ܫܲܦܝܼܖܹ̈ܐ. ܕܟ̣ܘܿܪ ܕܚܛܝܼܬܵܐ ܝܠܵܗ̇ ܠܸܦܝܵܫܵܐ ܒܫܸܟ ܒܚܲܒܪܘܼܗܝ ܕܒܝܼܘܼܗܝ ܩܘܼܘܸܠܵܐ ܝܠܹܗ ܩܵܬܘܼܟ̣ ܕܗܸܟ̃ ܠܹܐ ܬܵܠܩܸܬ. ܫܒ̣ܘܿܩ ܚܲܝܹ̈ܐ ܐܵܒܵܕܝܼܢܵܝܹ̈ܐ ܕܐܝܼܬ ܓܵܘ ܓܵܢܘܼܟ̣ ܡܲܚܙܝܼ ܓܵܢܵܝ ܒܚܵܕܘܼܬܵܐ ܕܚܵܛܸܪܓ̰ܲܡܥܘܼܬܵܐ.