ܣܒܒ ܗܐ: ܐܢܐ ܦܩܘܕܐ ܝܘܢ: ܘܒܬ ܡܫܥܫܢ ܒܟܠܝ ܡܠܬ̈ܐ ܠܒܝܬ ܝܣܪܝܠ: ܕܐܟ̣ܝ ܕܫܥܫ ܒܥܪܒܠܐ: ܘܠܐ ܢܦܠܐ ܕܢܕܟܬܐ ܠܐܪܥܐ (ܥܡܘܣ ܛ: 9)

ܟܠ ܣܪܵܕܬܵܐ ܝܲܢ ܡܲܫܥܲܫܬܵܐ ܟܹܐ ܐܵܬܝܼܵܐ ܥܲܠܲܢ ܒܦܲܩܵܕܬܵܐ ܘܒܪܘܼܚܨܲܬ ܐܲܠܵܗܵܝܬܵܐ. ܣܵܛܵܢܵܐ ܓܵܪܵܓ ܕܛܵܠܸܒ ܪܘܼܚܨܲܬ ܡ̣ܢ ܩܲܕ݉ܡ ܕܡܵܨܹܐ ܠܸܕܩܵܪܵܐ ܒܐܝܼܘܿܒ̣. ܣܵܛܵܢܵܐ ܟܹܐ ܗܵܘܝܵܐ ܕܕܵܒ̣ܸܩ ܠܵܗ̇ ܥܸܪܒܵܠܵܐ ܒܐܝܼܕܘܼܗܝ ܒܗܹܒ̣ܝܼ ܕܡܲܚܪܸܒ̣ ܠܕܲܚܠܵܐ: ܐܝܼܢܵܐ ܐܝܼܕܵܐ ܕܡܲܠܟܵܐ ܕܡܲܠܟܹ̈ܐ ܕܵܟ̣ܘܼܝܘܼܗ̇ ܝܠܵܗ̇ ܗ̇ܝ ܕܲܚܠܵܐ ܗܲܪ ܒܗ̇ܘ ܫܘܼܠܵܐ ܕܕܸܫ̃ܡܸܢ ܒܹܥܒ̣ܵܕܘܼܗܝ ܝܗ݉ܘܵܐ ܩܵܐ ܡܲܚܪܵܒ̣ܬܘܼܗ̇. ܝܵܐ ܕܲܚܠܵܐ ܡܵܪܹܐ ܛܝܼܡܵܐ ܐܝܼܢܵܐ ܪܵܒܵܐ ܣܪܝܼܕܬܵܐ ܕܒܐܝܼܕܵܐ ܕܡܵܪܝܵܐ: ܫܩܘܿܠܝ ܠܸܒܵܐ ܡ̣ܢ ܐܵܗܵܐ ܣܲܪܲܣܬܘܼܬܵܐ: ܕܐܲܠܵܗܵܐ ܟܹܐ ܡܲܦܠܸܚ ܗܲܡ ܓ̰ܲܪܓ̰ܲܪ ܘܗܲܡ ܥܸܪܒܵܠܵܐ ܩܵܐ ܚܸܩܪܵܐ ܕܓܵܢܘܼܗܝ: ܘܩܵܐ ܦܵܝܕܵܐ ܐܵܒܵܕܝܼܢܵܝܵܐ ܕܝܼܵܟ̣ܝ.

ܡܫܝܼܚܵܐ ܐܲܠܒܲܬ ܒܸܬ ܡܲܦܠܸܚ ܠܵܗ̇ ܗ̇ܝ ܪܘܼܦ̮ܫܬܵܐ ܕܝܼܠܵܗ̇ ܒܐܝܼܕܹܗ: ܘܒܸܬ ܦܵܪܸܫ ܠܨܦܵܝܝܼ ܡ̣ܢ ܣܸܪܝܵܐ. ܟܠܵܝ ܕܝܼܢܵܐ ܓܵܘ ܝܼܣܪܵܝܹܠ ܠܹܐ ܝܢܵܐ ܝܼܣܲܖ̈ܠܵܝܹܐ. ܟܠܵܝ ܚܸܛܹ̈ܐ ܠܹܐ ܝܢܵܐ ܨܲܦ. ܒܘܼܬ ܐܵܗܵܐ: ܕܵܟ̣ܵܝܬܵܐ ܠܵܙܸܡ ܝܼܠܵܗ̇ ܩܵܬܵܝ. ܓܵܘ ܥܸܪܒܵܠܵܐ ܐܲܚܟ̰ܝܼ ܚܸܛܹ̈ܐ ܨܵܚ ܟܹܐ ܦܵܝܫܝܼ. ܟ̰ܲܬ ܘܒܲܪܒܹܐ: ܟ̰ܘܼܢܟܹܐ ܕܩܵܠܘܿܠܹ̈ܐ ܝܢܵܐ: ܟܹܐ ܦܵܝܫܝܼ ܠܘܼܒܠܹܐ ܒܦܵܘܚܵܐ: ܘܐܲܚܟ̰ܝܼ ܕܲܚܠܵܐ ܨܵܚ ܟܹܐ ܦܵܝܫܵܐ.

ܦܵܟܸܪ ܠܣܵܠܵܡܲܬܘܼܬܵܐ ܟܵܡܝܼܠ ܕܚܸܛܹ̈ܐ ܕܐܲܠܵܗܵܐ. ܗ̇ܘ ܩܘܼܘܸܠܵܐ ܝܠܹܗ ܕܢܵܛܸܪܵܗ̇ ܟܠ ܕܲܢܕܸܟܬܵܝ. ܐܲܠܵܗܵܐ ܒܓܵܢܘܼܗܝ ܒܸܬ ܣܵܪܸܕ ܠܗ݉ܘܿܢ: ܒܘܼܬ ܐܵܗܵܐ: ܐܵܗܵܐ ܚܲܕ݉ ܫܘܼܠܵܐ ܣܲܗܡܵܢܵܐ ܘܩܸܫܝܵܐ ܝܠܹܗ: ܒܸܣܪܵܕܵܝ ܝܠܹܗ ܒܟܠܵܝ ܕܘܼܟܵܢܹ̈ܐ ܘܓܵܘ ܟܠܵܝ ܡܸܠܲܬܹ̈ܐ. ܒܸܣܪܵܕܵܝ ܝܠܹܗ ܒܗ̇ܘ ܬܵܗܵܪ ܒܘܼܫ ܡܵܪܹܐ ܟܵܪ: ܕܵܐܟ̣ܝܼ ܕܕܲܚܠܵܐ ܟܹܐ ܦܵܝܫܵܐ ܣܪܝܼܕܬܵܐ ܒܥܸܪܒܵܠܵܐ: ܐܝܼܢܵܐ ܡܸܢ݉ܕܪܸܫ݉: ܗ̇ܘ ܠܹܐ ܫܵܒ̣ܸܩ ܕܐܘܼܦ ܚܕܵܐ ܕܲܢܕܸܟܬܵܐ ܟ̰ܸܡ ܙܥܘܿܪܬܵܐ ܝܲܢ ܩܵܠܘܿܠܬܵܐ ܢܵܦܠܵܐ ܠܐܲܪܥܵܐ. ܟܠ ܗܲܡܸܢܵܢܵܐ ܒܢܲܦ̮ܫܘܼܗܝ ܡܵܪܹܐ ܩܲܕܪܵܐ ܝܠܹܗ ܒܥܲܝܢܹ̈ܐ ܕܐܲܠܵܗܵܐ. ܪܵܥܝܵܐ ܠܹܐ ܒܵܥܹܐ ܕܬܵܠܸܩ ܐܘܼܦ ܚܲܕ݉ ܥܸܪܒܵܐ: ܘܙܲܪܓܲܪ ܠܹܐ ܒܵܥܹܐ ܕܡܲܢܦܸܠ ܐܘܼܦ ܚܲܕ݉ ܐܲܠܡܵܣ: ܝܸܡܵܐ ܠܹܐ ܒܵܥܝܵܐ ܕܡܵܝܸܬ ܝܵܠܘܼܗ̇: ܘܐܘܼܦ ܠܵܐ ܐ݉ܢܵܫܵܐ ܕܗܲܕܵܡܘܼ̈ܗܝ ܣܲܩܵܬ: ܐܘܼܦ ܡܵܪܝܵܐ ܠܹܐ ܒܵܥܹܐ ܠܬܵܠܘܿܩܹܐ ܗܸܟ̃ ܚܲܕ݉ ܡ̣ܢ ܦܖ̈ܝܼܩܘܼܗܝ. ܙܵܪܵܪ ܠܲܝܬ ܟܡܵܐ ܙܥܘܿܖܹ̈ܐ ܝܘܲܚ: ܐܸܢ ܐܲܚܟ̰ܝܼ ܕܡܫܝܼܚܵܐ ܝܘܲܚ: ܫܒ̣ܘܿܩ ܚܵܕܲܚ ܕܦܝܵܫܵܐ ܝܘܲܚ ܢܛܝܼܪܹܐ ܒܝܼܘܼܗܝ.