ܡܘܪܡ ܠܗ̇ ܚܕܐ ܒܟ̣ܬܐ ܩܠܘܗ̇: ܡܢ ܟܢܫܐ: ܘܐ݉ܡܝܪܗ̇ ܐܠܗ: ܛܘܒ̣ܐ ܠܟܪ݉ܣܐ ܕܩܡ ܛܥܢܐ ܠܘܟ̣: ܘܠܒܙܙ̈ܐ ܕܡܝܨ ܠܘܟ̣: ܐܡܪ ܐܠܘܗ̇ ܗ̇ܘ: ܐܝܢܐ ܙܘܕܐ ܛܘܒ̣ܐ ܠܐܢܝ ܕܫܡܥܝ ܗܡܙܡܢ ܕܐܠܗܐ ܘܢܛܪܝ ܠܗ̇ (ܠܘܩܐ ܝܐ: 27-28)

ܚܲܕ݉ܟܡܵܐ ܡܲܚܸܒܵܢܹ̈ܐ ܕܡܫܝܼܚܵܐ ܟܹܐ ܚܵܫܒ̣ܝܼ ܕܚܲܕ݉ ܐܝܼܩܵܪܵܐ ܪܵܒܵܐ ܓܘܼܪܵܐ ܐܝܼܬ ܗ݉ܘܵܐ ܩܵܐ ܝܸܡܵܐ ܕܡܫܝܼܚܵܐ: ܣܵܒܵܒ ܟܹܐ ܚܵܫܒ̣ܝܼ ܕܗ̇ܝ ܐܝܼܬ ܗ݉ܘܵܐ ܠܵܗ̇ ܦܸܪܨܲܬ ܠܓܲܫܘܿܩܹܐ ܟ̰ܸܡ ܓܵܘ ܠܸܒܘܼܗܝ ܒܚܲܕ݉ ܬܵܗܵܪ ܕܐܲܚܢܲܢ ܠܹܐ ܡܵܨܲܚ ܠܹܥܒ̣ܵܕܵܐ. ܒܲܠܟܵܐ ܐܝܼܬ ܚܲܕ݉ ܩܵܕܸܪ ܕܒܵܘܵܪܘܼܬܵܐ ܒܐܵܗܵܐ ܚܫܵܒ̣ܬܵܐ: ܐܝܼܢܵܐ ܠܵܐ ܪܵܒܵܐ. ܐܲܚܢܲܢ ܠܹܐ ܝܵܕܥܲܚ ܐܸܢ ܡܲܪܝܲܡ ܟܹܐ ܝܵܕܥܵܐ ܗ݉ܘܵܐ ܒܘܼܬ ܕܝܼܘܼܗܝ ܙܵܘܕܵܐ ܡ̣ܢ ܐ݉ܚܸܖ̈݉ܢܹܐ. ܡ̣ܢ ܡܸܢܕܝܼ ܕܒܸܩܪܵܝܵܐ ܝܘܲܚ ܓܵܘ ܐܹܘܲܢܓܵܠܝܼܘܿܢܹ̈ܐ ܠܹܐ ܝܠܵܗ̇ ܡܲܒܝܘܼܢܹܐ ܕܗ̇ܝ ܒܘܼܫ ܨܦܵܝܝܼ ܝܠܝܼܦܬܵܐ ܝܗ݉ܘܵܐ ܡ̣ܢ ܬܲܠܡܝܼܕܹ̈ܐ ܐ݉ܚܸܖ̈݉ܢܹܐ ܕܡܫܝܼܚܵܐ. ܟܠ ܡܸܢܕܝܼ ܕܗ̇ܝ ܟܹܐ ܝܵܕܥܵܐ ܗ݉ܘܵܐ: ܐܘܼܦ ܐܲܚܢܲܢ ܟܹܐ ܡܵܨܲܚ ܝܵܠܦܲܚ ܠܹܗ. ܥܲܓ̰ܘܿܒܹܐ ܝܘܸܬ ܕܗܲܕܟ̣ܵܐ ܒܹܐܡܵܪܵܐ ܝܘܸܢ؟ ܕܘܼ ܝܠܹܗ ܚܲܕ݉ ܓ̰ܲܪܓܵܐ ܕܒܹܥܒ̣ܵܕܘܼܗ̇ ܝܠܹܗ ܣܵܒܸܬ ــ ܒܸܣܬܵܝܘܼܬܵܐ ܕܡܵܪܝܵܐ ܠܙܕܝܼܥܘܼ̈ܗܝ: ܘܩܵܘܠܘܼܗܝ ܠܡܲܕܘܼܥܵܝ. ܕܟ̣ܘܿܪ ܠܚܲܒܖܹ̈ܐ ܕܡܵܪܲܢ: ــ ܡܐܵܕܝܼܵܐ ܠܹܐ ܩܵܪܸܢܵܘܟ̣ܘܿܢ ܖܹ̈ܓܵܘܵܬܹܐ: ܣܵܒܵܒ ܪܹܓܵܐ ܠܹܐ ܝܵܕܸܥ ܡܘܼܕܝܼ ܟܹܐ ܥܵܒ̣ܸܕ ܐܵܓ̣ܵܝܹܗ. ܐܝܼܢܵܐ ܕܵܘܣܬܝܼ̈ ܩܵܡ ܩܵܪܸܢܵܘܟ̣ܘܿܢ: ܣܵܒܵܒ ܟܠ ܕܫܡܸܥܠܝܼ ܡ̣ܢ ܒܵܒܝܼ ܡܘܼܕܸܥܠܝܼ ܩܵܬܵܘܟ̣ܘܿܢ. ܐܘܼܚܟ̰ܵܐ ܒܬܲܡܵܡܲܬܘܼܬܵܐ ܐܵܗܵܐ ܓܲܠܝܵܢܵܐ ܕܣܵܖܹ̈ܐ ܐܲܠܵܗܵܝܹ̈ܐ ܡܲܕܘܼܥܘܼܗܝ ܝܠܹܗ ܠܸܒܘܼܗܝ ܩܵܬܲܢ: ܕܠܹܐ ܝܠܹܗ ܒܸܚܣܵܟ̣ܵܐ ܗܸܟ̃ ܡܸܢܕܝܼ ܕܝܼܠܹܗ ܡܵܪܹܐ ܦܵܝܕܵܐ. ܗ̇ܘ ܒܓܵܢܘܼܗܝ ܒܹܥܒ̣ܵܕܲܢ ܝܠܹܗ ܚܵܛܸܪܓ̰ܲܡܥ ܒܘܼܬ ܐܵܗܵܐ ܟܲܕ ܒܹܐܡܵܪܵܐ ܝܠܹܗ: ܘܐܸܢ ܠܵܐ: ܒܸܬ ܐܵܡܪܸܢ ܗ݉ܘܵܐ ܠܵܘܟ̣ܘܿܢ. ܐܲܚܢܲܢ ܐܝܼܬ ܠܲܢ ܗܲܓ̰ܲܬ ܓܘܼܪܬܵܐ ܠܫܲܒܘܿܚܹܐ ܠܐܲܠܵܗܵܐ ܕܟܲܕ ܫܡܝܼܥܹܐ ܝܘܲܚ ܠܗܸܡܸܙܡܵܢ: ܘܢܛܝܼܪܘܼܗ̇ ܝܘܲܚ: ܩܲܕ݉ܡܵܝܬܵܐ: ܐܝܼܬ ܠܲܢ ܚܕܵܐ ܫܲܪܝܼܟܘܼܬܵܐ ܘܒܵܠܵܕܘܼܬܵܐ ܒܦܵܪܘܿܩܲܢ ܠܵܐ ܒܵܨܘܿܪܬܵܐ ܡ̣ܢ ܗ̇ܝ ܕܡܲܪܝܲܡ ܒܬܘܼܠܬܵܐ: ܘܕܬܲܪܬܹܝ: ܐܝܼܬ ܠܲܢ ܒܵܠܵܕܘܼܬܵܐ ܫܲܪܝܼܪܬܵܐ ܒܣܸܖܹ̈ܐ ܕܠܸܒܘܼܗܝ ܗܲܪ ܐܲܝܟ̣ ܕܦܝܼܫܬܵܐ ܝܠܵܗ̇ ܚܫܝܼܒ̣ܬܵܐ ܕܗ̇ܝ ܐܝܼܬ ܗ݉ܘܵܐ ܠܵܗ̇. ܒܪܝܼܟ̣ܬܵܐ ܝܠܵܗ̇ ܓܵܢܲܢ ܕܐܝܼܬܠܵܗ̇ ܦܵܝܕܹ̈ܐ ܐܘܼܚܟ̰ܵܐ ܓܘܿܖܹ̈ܐ!