ܬܡܘܙ 4
ܩܕܫ ܠܗ݉ܘܢ ܒܣܪܣܬܘܬܘܟ̣ (ܝܘܚܢܢ ܝܙ: 17)
ܩܵܕܲܫܬܵܐ ܟܹܐ ܫܲܪܝܵܐ ܒܚܘܼܕܵܬܵܐ. ܪܘܼܚܵܐ ܕܐܲܠܵܗܵܐ ܟܹܐ ܢܵܫܡܵܐ ܒܒܲܪܢܵܫܵܐ ܗ̇ܝ ܢܵܦܵܣ ܕܚܲܝܹ̈ܐ ܚܵܕܬܹ̈ܐ ܕܒܝܼܘܼܗ̇ ܐ݉ܢܵܫܵܐ ܒܹܗܘܵܝܵܐ ܝܠܹܗ ܒܪܝܼܬܵܐ ܚܲܕܬܵܐ ܒܝܑܼܫܘܿܥ ܡܫܝܼܚܵܐ. ܐܵܗܵܐ ܫܘܼܠܵܐ ܕܫܲܪܘܿܝܹܐ ܝܠܹܗ ܒܗ݉ܘܵܝܬܵܐ ܕܬܲܪܬܹܝ ܒܹܐܙܵܠܵܐ ܝܠܹܗ ܠܵܩܲܕ݉ܡܘܼܗܝ ܒܬܲܪܬܹܝ ܐܘܼܖ̈ܚܵܬܹܐ ــ ܡܲܡܝܲܬܬܵܐ: ܕܒܝܼܘܼܗ̇ ܫܲܗܘܲܬܝܵܬܹ̈ܐ ܕܒܸܣܪܵܐ ܟܹܐ ܦܵܝܫܝܼ ܙܘܼܒܛܸܢܹܐ ܘܡܘܼܟܸܦܹܐ: ܘܡܲܚܵܝܬܵܐ: ܕܒܝܼܘܼܗ̇ ܐܵܢܝܼ ܚܲܝܹ̈ܐ ܕܐܲܠܵܗܵܐ ܢܨܝܼܒ̣ܵܝ ܝܠܹܗ ܒܝܼܲܢ ܟܹܐ ܗܵܘܝܼ ܚܲܕ݉ ܒܹܪܵܐ ܕܡ̈ܝܼܵܐ ܚܵܝܹ̈ܐ ܒܸܢܒ̣ܵܥܵܐ ܠܚܲܝܹ̈ܐ ܐܵܒܵܕܝܼܢܵܝܹ̈ܐ. ܐܵܗܵܐ ܒܸܦܠܵܚܵܐ ܝܠܵܗ̇ ܝܵܘܡܵܐ ܒܝܵܘܡܵܐ ܒܫܵܗܲܪܬܵܐ: ܕܒܝܼܘܼܗ̇ ܟܪܸܣܛܝܵܢܵܐ ܟܹܐ ܦܵܐܸܫ ܢܛܝܼܪܵܐ ܘܚܘܼܡܝܵܐ ܒܐܲܗܘܵܠ ܕܫܵܦܵܩܲܬ: ܘܟܹܐ ܦܵܐܸܫ ܡܘܼܙܝܸܕܵܐ ܒܦܘܼܠܚܵܢܹ̈ܐ ܛܵܒ̣ܹ̈ܐ ܠܚܸܩܪܵܐ ܘܐܝܼܩܵܪܵܐ ܕܐܲܠܵܗܵܐ: ܘܒܸܡܛܵܝܵܐ ܝܠܵܗ̇: ܝܲܢ ܒܸܟܡܵܠܵܐ ܒܚܸܩܪܵܐ: ܐܲܝܟܵܐ ܕܓܵܢܵܐ ܕܘܼܟ̣ܝܼܬܵܐ ܒܬܲܡܵܡܲܬܘܼܬܵܐ ܟܹܐ ܦܵܝܫܵܐ ܓ̰ܢܝܼܘܬܵܐ ܘܡܘܼܐܣܸܩܬܵܐ ܠܹܥܡܵܪܵܐ ܥܲܡ ܐܝܼܬܝܹ̈ܐ ܩܲܕܝܼܫܹ̈ܐ ܠܝܲܡܝܼܢܵܐ ܕܗܸܙܘܼܪ ܕܥܸܠܵܝܵܐ. ܐܝܼܢܵܐ ܟܲܕ ܪܘܼܚܵܐ ܕܐܲܠܵܗܵܐ ܗܲܕܟ̣ܵܐ ܡܲܥܒ̣ܸܕܵܢܬܵܐ ܕܩܵܕܲܫܬܵܐ ܝܠܵܗ̇: ܡܸܢ݉ܕܪܸܫ݉ ܐܝܼܬ ܚܲܕ݉ ܐܲܣܒܵܒ ܕܟܹܐ ܦܵܐܸܫ ܡܘܼܦܠܸܚܵܐ ܕܓܵܪܵܓ ܠܵܐ ܦܵܐܸܫ ܡܘܼܢܫܝܼܵܐ. ܡܫܝܼܚܵܐ ܒܹܐܡܵܪܵܐ ܝܠܹܗ: ܩܵܕܼܫ ܠܗ݉ܘܿܢ ܒܣܲܪܲܣܬܘܼܬܘܼܟ̣: ܕܗܸܡܸܙܡܵܢ ܕܝܼܘܼܟ̣ ܣܲܪܲܣܬܘܼܬܵܐ ܝܼܠܵܗ̇. ܪܵܒܵܐ ܝܢܵܐ ܦܵܣܘܿܩܹ̈ܐ ܓܵܘ ܟܬܵܒ̣ܹ̈ܐ ܩܲܕܝܼܫܹ̈ܐ ܕܒܹܥܒ̣ܵܕܵܐ ܝܢܵܐ ܣܵܒܸܬ ܕܐܲܣܒܵܒ ܕܩܵܕܲܫܬܲܢ ܗܸܡܸܙܡܵܢ ܕܐܲܠܵܗܵܐ ܝܠܵܗ̇. ܪܘܼܚܵܐ ܕܐܲܠܵܗܵܐ ܟܹܐ ܡܲܝܬ݉ܝܵܐ ܩܲܕ݉ܡ ܒܵܠܲܢ ܩܵܢܘܿܢܹ̈ܐ ܘܝܘܼܠܦܵܢܹ̈ܐ ܕܣܲܪܲܣܬܘܼܬܵܐ: ܘܟܹܐ ܡܲܠܚܸܡܵܐ ܠܗ݉ܘܿܢ ܒܚܲܝܠܵܐ ܓܘܼܪܵܐ. ܐܲܢܹܐ ܟܹܐ ܦܵܝܫܝܼ ܫܡܝܼܥܹܐ ܒܢܵܬܵܐ: ܘܐܝܼܡܵܐ ܕܗܵܘܝܼ ܩܘܼܒܠܹܐ ܒܠܸܒܵܐ ܟܹܐ ܥܵܒ̣ܕܝܼ ܠܲܢ ܕܦܵܠܚܲܚ ܘܕܒܵܥܲܚ ܠܪܸܙܵܝܵܐ ܛܵܒ̣ܵܐ ܕܐܲܠܵܗܵܐ. ܣܲܪܲܣܬܘܼܬܵܐ ܝܠܵܗ̇ ܩܵܕܫܲܢܬܵܐ. ܘܐܸܢ ܠܵܐ ܫܵܡܥܲܚ ܝܲܢ ܩܵܪܲܚ ܠܣܲܪܲܣܬܘܼܬܵܐ: ܠܹܐ ܓܲܪܘܸܣܲܚ ܒܩܵܕܲܫܬܵܐ. ܐܲܚܟ̰ܝܼ ܟܹܐ ܡܵܨܲܚ ܐܵܙܲܠ݉ܚ ܠܵܩܲܕ݉ܡܵܐ ܒܚܲܝܹ̈ܐ ܩܲܕܝܼܫܹ̈ܐ ܟܡܵܐ ܕܐܵܙܲܠ݉ܚ ܠܵܩܲܕ݉ܡܵܬ ܒܦܲܪܡܵܝܬܵܐ ܬܪܘܼܨܬܵܐ. ܫܪܵܥܵܐ ܝܠܹܗ ܠܐܲܩܠܝܼ ܚܲܒܪܘܼܟ̣: ܘܒܲܗܪܵܐ ܠܓ̰ܵܕܝܼ. ܕܒ̣ܘܿܩ ܩܘܼܝܵܐ ܒܣܲܪܲܣܬܘܼܬܵܐ: ܣܵܒܵܒ ܐܸܢ ܗܲܕܟ̣ܵܐ ܕܵܒ̣ܩܸܬ ܠܵܗ̇: ܒܸܬ ܦܵܝܫܸܬ ܡܩܘܼܕܫܵܐ ܒܪܘܼܚܵܐ ܕܐܲܠܵܗܵܐ.