ܡܩܘܕܫ̈ܐ ܒܐܠܗܐ ܒܒܐ (ܝܗܘܕܐ 1). ܒܝܑܫܘܥ ܡܫܝܚܐ ܩܘܕܫ̈ܐ (ܐ ܩܘܖ̈ܢܬܝܐ ܐ: 2). ܒܩܕܝܫܘܬܐ ܕܪܘܚܐ (ܐ ܦܛܪܘܣ ܐ: 2)

ܦܵܟܸܪ ܒܙܲܘܲܓܬܲܐ ܕܐܲܢܹܐ ܬܠܵܬ݉ܐ ܩܢܘܿܡܹ̈ܐ ܐܲܠܵܗܵܝܹ̈ܐ ܒܟܠܵܝ ܦܘܼܠܚܵܢܵܝ̈ ܕܫܵܦܵܩܲܬ. ܐܵܢܝܼ ܗܲܡܸܢܵܢܹ̈ܐ ܕܟܹܐ ܡܲܬܒ̣ܝܼ ܦܘܼܪܫܘܼܢܝܵܐ ܒܹܝܠ ܐܲܢܹܐ ܩܢܘܿܡܹ̈ܐ ܪܵܒܵܐ ܒܹܐ ܦܲܪܡܵܝܬܵܐ ܝܢܵܐ. ܟܹܐ ܚܵܫܒ̣ܝܼ ܕܡܫܝܼܚܵܐ ܝܠܹܗ ܓ̰ܲܡܥ ܕܟܠ ܡܸܢܕܝܼ ܓ̰ܸܢܣ ܘܡܸܠܝܵܐ ܡ̣ܢ ܫܵܦܵܩܲܬ: ܠܒܵܒܵܐ ܟܹܐ ܓܲܫܩܝܼ ܐܲܝܟ̣ ܡܵܪܹܐ ܟܹܐܢܘܼܬܵܐ ܪܵܒܵܐ ܩܫܝܼܬܵܐ: ܘܕܠܵܐ ܖ̈ܲܚܡܹܐ. ܗܲܪ ܚܲܕ݉ ܗܵܕܵܐ ܠܹܐ ܝܢܵܐ ܬܖ̈ܘܼܨܹܐ ܐܵܢܝܼ ܕܟܹܐ ܓܲܪܘܸܣܝܼ ܠܦܘܼܩܕܵܢܵܐ ܕܒܵܒܵܐ ܘܠܚܘܼܣܵܝܵܐ ܕܒܪܘܿܢܵܐ ܗܲܠ ܕܟܹܐ ܡܲܒܨܸܪܝܼ ܠܦܘܼܠܚܵܢܵܐ ܕܪܘܼܚܵܐ. ܒܦܘܼܠܚܵܢܹ̈ܐ ܕܫܵܦܵܩܲܬ: ܗܸܟ̃ ܚܲܕ݉ ܡ̣ܢ ܩܢܘܿܡܹ̈ܐ ܕܬܠܝܼܬܵܝܘܼܬܵܐ ܠܹܐ ܦܵܠܸܚ ܕܠܵܐ ܐܵܢܝܼ ܐ݉ܚܹܖ̈݉ܢܹܐ. ܐܵܢܝܼ ܒܦܘܼܠܚܵܢܵܝ̈ ܙܘܼܘܸܓܹܐ ܝܢܵܐ ܗܲܪ ܐܲܝܟ̣ ܕܒܟܝܵܢܵܝ. ܒܚܘܼܒܵܝ ܕܠܟܸܣ ܓܘܼܒܝܹ̈ܐ ܚܲܕ݉ ܝܼܢܵܐ: ܘܒܟܠܵܝ ܥܵܠܵܡܹ̈ܐ ܕܟܹܐ ܦܵܠܛܝܼ ܡ̣ܢ ܗ̇ܘ ܡܲܒܘܼܥܵܐ ܓܘܼܪܵܐ ܩܸܢܛܪܘܿܢܵܝܵܐ ܡܸܢ݉ܕܪܸܫ݉ ܚܲܕ݉ ܝܼܢܵܐ ــ ܐܸܠܵܐ ܟܹܐ ܦܵܟܸܪ ܠܐܵܗܵܐ ܒܫܘܼܠܵܐ ܕܩܵܕܲܫܬܵܐ. ܟܲܕ ܕܠܵܐ ܚܸܠܛܵܐ ܟܹܐ ܡܵܨܲܚ ܠܗܲܡܙܘܼܡܹܐ ܒܘܼܬ ܫܘܼܠܵܐ ܕܩܵܕܲܫܬܵܐ ܐܲܝܟ̣ ܫܘܼܠܵܐ ܕܪܘܼܚܵܐ: ܡܸܢ݉ܕܪܸܫ݉ ܓܵܪܵܓ ܗܵܘܲܚ ܗܸܫܝܵܪ ܠܵܐ ܗ݉ܘܹܐ ܕܓܲܫܩܲܚ ܥܲܠܘܼܗܝ ܐܲܝܟ̣ ܐܸܢ ܒܵܒܵܐ ܘܒܪܘܿܢܵܐ ܠܲܝܬ ܗ݉ܘܵܘ ܠܗ݉ܘܿܢ ܫܲܪܝܼܟܘܼܬܵܐ ܒܝܼܘܼܗܝ. ܕܘܼܙ ܝܼܠܵܗ̇ ܠܗܲܡܙܘܼܡܹܐ ܒܘܼܬ ܫܘܼܠܵܐ ܕܩܵܕܲܫܬܵܐ ܐܲܝܟ̣ ܫܘܼܠܵܐ ܕܒܵܒܵܐ ܘܕܒܪܘܿܢܵܐ ܘܕܪܘܼܚܵܐ ܩܲܕܝܼܫܵܐ. ܐܘܼܦ ܐܵܕܝܼܵܐ ܝܼܗܘܿܘܵܐ ܒܹܐܡܵܪܵܐ ܝܠܹܗ: ܒܵܪܲܚ ܐ݉ܢܵܫܵܐ ܒܨܲܠܡܲܢ ܘܒܕܵܡܵܝܬܲܢ. ܘܗܲܕܟ̣ܵܐ ܐܲܚܢܲܢ ܒܸܖ̈ܝܹܐ ܕܝܼܹܗ ܝܘܲܚ ܕܦܝܼܫ ܠܲܢ ܒܸܪܝܹܐ ܒܝܑܼܫܘܿܥ ܡܫܝܼܚܵܐ ܩܵܐ ܦܘܼܠܚܵܢܹ̈ܐ ܛܵܒ̣ܹ̈ܐ: ܐܵܢܝܼ ܕܩܲܕ݉ܡܵܝܬܵܐ ܗܘܼܕܸܪܹܗ ܐܲܠܵܗܵܐ ܕܚܵܕܪܲܚ ܗ݉ܘܵܘ ܒܝܼܵܝ. ܚܙܝܼ ܟܡܵܐ ܩܘܼܠܒ ܐܲܠܵܗܵܐ ܟܹܐ ܡܲܬܸܒ̣ ܥܲܠ ܩܲܕܝܼܫܘܼܬܵܐ ܫܲܪܝܼܪܬܵܐ: ܣܵܒܵܒ ܬܸܠܘܿܢܬܵܝ ܩܢܘܿܡܹ̈ܐ ܡܥܘܼܕܵܠܹܐ ܒܸܦܠܵܚܵܐ ܝܢܵܐ ܠܬܵܪܘܿܨܹܐ ܚܕܵܐ ܥܹܕܬܵܐ ܒܹܐ ܠܵܘܡܵܐ ܘܠܲܟܵܐ. ܘܐܘܼܦ ܐܲܢ݉ܬ: ܗܲܡܸܢܵܢܵܐ: ܓܵܪܵܓ ܡܲܬܒ̣ܸܬ ܪܵܒܵܐ ܩܘܼܠܒ ܥܲܠ ܩܲܕܝܼܫܘܼܬܵܐ ــ ܥܲܠ ܕܸܟ̣ܝܘܼܬܵܐ ܕܚܲܝܹ̈ܐ ܘܨܸܦܝܘܼܬܵܐ ܕܨܵܘܗܒܲܬ. ܗܲܪ ܒܐܵܗܵܐ ܝܵܘܡܵܐ ܫܲܪܲܚ ܠܹܚܵܝܵܐ ܗܲܕܟ̣ܵܐ ܚܲܝܹ̈ܐ ܕܒܝܼܲܢ ܦܵܐܸܫ ܓܸܠܝܵܐ ܦܘܼܠܚܵܢܵܐ ܕܬܠܝܼܬܵܝܘܼܬܵܐ ܐܲܠܵܗܵܝܬܵܐ ܕܓܵܘܲܢ.