ܬܡܘܙ 31
ܘܐܢܐ ܒܝܝ (ܝܘܚܢܢ ܝܙ: 23)
ܐܸܢ ܗܲܕܟ̣ܵܐ ܝܠܹܗ ܝܸܣܘܼܪܵܐ ܕܙܲܘܘܼܓܲܢ ܝܼܠܹܗ ܥܲܡ ܡܵܪܲܢ: ܟܡܵܐ ܦܸܬܝܵܐ ܘܥܵܡܩܘܼ ܝܼܠܹܗ ܢܲܗܪܵܐ ܕܫܲܪܝܼܟܘܼܬܲܢ ܥܲܡܘܼܗܝ! ܐܵܗܵܐ ܠܹܐ ܝܠܵܗ̇ ܚܕܵܐ ܫܵܩܝܼܬܵܐ ܙܥܘܿܪܬܵܐ ܘܥܝܼܩܬܵܐ: ܐܝܼܢܵܐ ܚܲܕ݉ ܢܲܗܪܵܐ ܕܒܟܠܹܗ ܝܘܼܪܟ̣ܘܼܗܝ ܚܩܝܼܪܵܐ ܡܸܠܝܵܐ ܝܠܹܗ ܡ̣ܢ ܛܵܘܦܵܢܵܐ ܕܡ̈ܝܼܵܐ ܕܚܲܝܹ̈ܐ. ܗܵܐ ܡܘܼܬܒ̣ܵܐ ܝܠܹܗ ܩܲܕ݉ܡܲܢ ܚܲܕ݉ ܬܲܪܥܵܐ ܦܬܝܼܚܵܐ: ܚܘܿܫ ܠܵܐ ܗܵܘܲܚ ܬܲܢܒܵܠ ܠܹܥܒ̣ܵܪܵܐ. ܐܵܗܵܐ ܡܕܝܼܢ݉ܬܵܐ ܕܫܲܪܝܼܟܘܼܬܵܐ ܐܝܼܬ ܠܵܗ̇ ܪܵܒܵܐ ܕܲܖ̈ܘܵܙܹܐ ܕܡܲܪܓܵܢܝܼܬܵܐ ܕܦܬܝܼܚܹܐ ܝܢܵܐ ܩܵܐ ܟܠܵܝ ܕܥܵܒ̣ܪܝܼ ܒܝܼܵܝ ܘܦܵܝܫܝܼ ܩܘܼܒܠܹܐ ܒܫܲܝܢܵܐ. ܐܸܢ ܐܲܚܟ̰ܝܼ ܚܕܵܐ ܟܵܘܹܐ ܥܝܼܩܬܵܐ ܗܵܘܝܵܐ ܝܗ݉ܘܵܐ ܦܬܝܼܚܬܵܐ ܩܵܐ ܗܲܡܙܲܡܬܲܢ ܥܲܡ ܡܫܝܼܚܵܐ: ܐܘܼܦ ܗ̇ܝ ܚܕܵܐ ܫܵܦܵܩܲܬ ܓܘܼܪܬܵܐ ܝܗ݉ܘܵܐ ܕܒܗ̇ܝ ܟܵܘܹܐ ܗܲܡܙܸܡܲܚ ܗ݉ܘܵܘ ܒܚܲܕ݉ ܩܵܕܸܪ: ܐܝܼܢܵܐ ܟܡܵܐ ܓܘܼܪܬܵܐ ܝܠܵܗ̇ ܒܘܼܪܟܬܵܐ ܕܥܒ̣ܵܪܬܲܢ ܒܐܵܙܵܕܘܼܬܵܐ ܐܘܼܚܟ̰ܵܐ ܬܲܡܵܡ! ܐܸܢ ܡܵܪܲܢ ܗܵܘܹܐ ܗ݉ܘܵܐ ܪܵܒܵܐ ܪܸܚܩܵܐ ܡܸܢܲܢ: ܘܚܕܵܐ ܝܵܡܵܐ ܦܬܝܼܬܵܐ ܡܠܝܼܬܵܐ ܡ̣ܢ ܒܘܼܖ̈ܵܢܹܐ ܗܵܘܝܵܐ ܗ݉ܘܵܐ ܒܹܝܠܲܢ: ܒܸܬ ܫܲܗܘܸܬܲܚ ܗ݉ܘܵܘ ܠܫܲܕܘܿܪܵܐ ܚܲܕ݉ ܩܵܨܸܕ ܠܟܸܣܠܘܼܗܝ ܠܡܲܡܛܘܼܝܹܐ ܩܵܬܘܼܗܝ ܚܘܼܒܲܢ ܘܕܫܲܕܸܪ ܗ݉ܘܵܐ ܩܵܬܲܢ ܚܲܒܖܹ̈ܐ ܒܲܣܝܼܡܹ̈ܐ ܡ̣ܢ ܒܲܝܬܵܐ ܕܒܵܒܘܼܗܝ. ܐܝܼܢܵܐ ܚܙܝܼ ܡܪܲܚܡܵܢܘܼܬܘܼܗܝ: ܒܲܝܬܘܼܗܝ ܒܸܢܝܘܼܗܝ ܝܠܹܗ ܟ̰ܸܡ ܒܕܸܦܢܵܐ ܕܒܲܝܬܵܐ ܕܝܼܲܢ: ܗܵܠܵܐ ܒܘܼܫ ܙܵܘܕܵܐ: ܒܸܫܪܵܝܵܐ ܝܠܹܗ ܗܲܪ ܠܟܸܣܠܲܢ: ܓܵܘ ܠܸܒܵܘܵܬ̈ܲܢ ܡܸܣܟܹܢܹ̈ܐ ܘܟܘܼܦܹ̈ܐ: ܩܵܐ ܕܒܐܵܗܵܐ ܐܘܼܪܚܵܐ ܗܵܘܝܵܐ ܠܹܗ ܫܲܪܝܼܟܘܼܬܵܐ ܥܲܡܲܢ ܒܕܵܝܸܡܘܼܬܵܐ. ܐܵܘܚ: ܟܡܵܐ ܢܲܙܵܢ ܒܸܬ ܗܵܘܲܚ ܐܸܢ ܠܵܐ ܥܵܒ̣ܕܲܚ ܥܵܕܲܬ ܕܫܲܪܝܼܟܘܼܬܵܐ ܥܲܡܘܼܗܝ. ܐܝܼܡܵܐ ܕܐܘܼܪܚܵܐ ܗܵܘܝܵܐ ܝܲܪܝܼܟ̣ܬܵܐ ܘܡܵܪܹܐ ܩܹܘܲܢܕܹܢܘܿܣ ܘܡܠܝܼܬܵܐ ܡ̣ܢ ܟ̰ܵܬܘܿܢܘܼܝܵܬܹ̈ܐ: ܠܹܐ ܝܠܵܗ̇ ܥܵܓ̰ܝܼܒܘܼܬܵܐ ܕܕܵܘܣܬܹ̈ܐ ܟܝܼܡ ܓܵܗܹ̈ܐ ܬܵܦܩܝܼ ܒܥܘܼܕܵܠܹܐ. ܐܝܼܢܵܐ ܐܝܼܡܵܐ ܕܡܥܘܼܕܵܠܹܐ ܒܸܚܵܝܵܐ ܝܢܵܐ: ܟܹܐ ܡܵܨܹܐ ܝܘܿܢܵܬܲܢ ܡܲܢܫܹܐ ܠܕܵܘܝܼܕ؟ ܚܕܵܐ ܒܲܟ̣ܬܵܐ ܐܝܼܡܵܐ ܕܓܲܒ̣ܪܘܼܗ̇ ܦܠܝܼܛܵܐ ܝܠܹܗ ܠܚܕܵܐ ܣܵܦܵܪ ܝܲܪܝܼܟ̣ܬܵܐ: ܟܹܐ ܡܵܨܝܵܐ ܚܵܡܠܵܐ ܕܠܵܐ ܗܲܡܙܲܡܬܵܐ ܥܲܡܘܼܗܝ: ܐܝܼܢܵܐ ܐܝܼܡܵܐ ܕܓܵܘ ܚܲܕ݉ ܒܲܝܬܵܐ ܝܢܵܐ: ܠܹܐ ܡܵܨܝܵܐ ܕܗܵܘܝܼ ܦܪܝܼܫܹܐ ܡ̣ܢ ܥܘܼܕܵܠܹܐ. ܗܲܡܸܢܵܢܵܐ: ܛܥܝܼ ܠܡܵܪܝܵܐ ܣܵܒܵܒ ܩܘܼܪܒܵܐ ܝܠܹܗ: ܚܦܘܿܩ ܠܹܗ ܣܵܒܵܒ ܐܲܚܘܿܢܘܼܟ̣ ܝܼܠܹܗ: ܕܒ̣ܘܿܩ ܠܹܗ ܩܘܼܝܵܐ ܘܚܠܘܿܨ ܠܹܗ ܠܠܸܒܘܼܟ̣ ܣܵܒܵܒ ܚܲܕ݉ ܝܼܠܹܗ ܥܲܡܘܼܟ̣.