ܡܠܟܘܬܐ: ܦܨܚܐ ܐܪܥܐ (ܡܙܡܘܪܐ ܨܙ: 1)

ܠܲܝܬ ܣܵܒܵܒܹ̈ܐ ܩܵܐ ܫܓ̣ܘܼܫܝܵܐ ܟܡܵܐ ܕܐܵܗܵܐ ܓ̰ܲܪܓܵܐ ܕܠܥܸܠܸܠ ܣܲܪܲܣܬ ܝܼܠܹܗ. ܚܲܝܠܵܐ ܕܡܵܪܝܵܐ ܟܹܐ ܡܵܨܹܐ ܠܙܲܒܛܘܼܢܹܐ ܠܚܸܡܬܵܐ ܕܒܲܪܢܵܫܵܐ ܗܲܪ ܐܲܝܟ̣ ܕܠܡܲܚܫܘܼܠܹ̈ܐ ܕܝܵܡܵܐ. ܚܘܼܒܘܼܗܝ ܟܹܐ ܡܵܨܹܐ ܠܡܲܣܒ̣ܘܼܥܹܐ ܠܡܸܣܟܹܢܹ̈ܐ ܒܖ̈ܲܚܡܹܐ ܗܲܪ ܐܲܝܟ̣ ܕܠܐܲܪܥܵܐ ܒܡܸܛܖ̈ܵܬܹܐ. ܙܲܪܝܼܦܘܼܬܘܼܗܝ ܟܹܐ ܠܲܓ̰ܠܸܓ̰ܵܐ ܒܓܹܐܖܹ̈ܐ ܢܘܼܖ̈ܵܢܵܝܹܐ ܒܹܝܦܲܠܓܵܐ ܕܣܲܗܡ ܕܒܘܼܪܵܢ: ܘܚܸܩܪܵܐ ܕܐܲܠܵܗܵܐ ܟܹܐ ܦܵܐܸܫ ܚܸܙܝܵܐ ܒܟܠܵܗ̇ ܙܲܪܝܼܦܘܼܬܘܼܗܝ ܒܢܦܵܠܬܵܐ ܕܐܸܡܦܪܵܬܘܿܖ̈ܘܼܝܵܬܹܐ ܘܒܫܡܵܛܬܵܐ ܕܬܖ̈ܘܿܢܘܿܣܹܐ. ܒܟܠܵܝ ܟ̰ܲܢܟ̰ܲܢܠܝ̈ܵܬܲܢ ܘܝܲܠܨܘܼ̈ܝܲܢ ܟܹܐ ܡܵܨܲܚ ܠܸܚܙܵܝܵܐ ܐܝܼܕܵܐ ܕܡܲܠܟܵܐ ܫܡܲܝܵܢܵܝܵܐ.

ܡܵܪܝܵܐ ܨܒ̣ܵܐܘܿܬ ܟܚܵܙܹܐ ܘܫܲܡܸܥ        ܠܦܲܖ̈ܦܲܠܝܵܬܲܢ ܘܒܸܟ̣ܝܲܢ ܒܕܸܡܥܹ̈ܐ.

ܕܵܐܟ̣ܝܼ ܡܲܢܫܸܢ ܐܘܼܦ ܒܝܲܠܨܘܼܝܝܼ        ܕܐܲܠܵܗܵܐ ܝܠܹܗ ܡܲܠܟܵܐ ܕܝܝܼ.

ܐܘܼܦ ܓܵܘ ܓܹܗܵܢܵܐ: ܖ̈ܘܼܚܵܬܹܐ ܕܫܹܐܕܹ̈ܐ ܒܫܲܩܝܼܘܼܬܵܝ ܟܹܐ ܝܲܕܥܝܼ ܠܪܹܫܵܢܘܼܬܵܐ ܕܡܵܪܝܵܐ. ܐܝܼܡܵܐ ܕܩܲܒܠܝܼ ܪܘܼܚܨܲܬ ܠܸܚܕܵܪܵܐ: ܡܸܢ݉ܕܪܸܫ݉ ܫܸܫܸܠܬܵܐ ܐ݉ܣܝܼܪܬܵܐ ܝܠܵܗ̇ ܒܐܲܩܠܵܝ̈: ܠܲܥܡܵܐ ܓܵܐ ܦܘܼܡܵܐ ܕܒܸܗܡܘܿܬ ܝܼܠܹܗ: ܘܟ̰ܲܢܓܵܠ ܒܦܘܼܡܵܐ ܕܠܸܘܝܵܬܵܢ. ܓܹܐܖܹ̈ܐ ܕܡܵܘܬܵܐ ܓܵܘ ܐܲܢܒܵܪ ܕܡܵܪܝܵܐ ܝܢܵܐ: ܘܠܟܸܣܠܘܼܗܝ ܝܠܹܗ ܩܕܝܼܠܵܐ ܕܙܸܢܕܵܢܹ̈ܐ ܕܩܲܒ̣ܪܵܐ. ܫܹܐܕܹ̈ܐ ܟܹܐ ܪܵܥܠܝܼ ܘܪܵܓܕܝܼ ܡ̣ܢ ܩܲܕ݉ܡ ܬܘܼܥܠܵܐ ܣܲܗܡܵܢܵܐ ܕܕܲܝܵܢܵܐ ܕܟܠܵܗ̇ ܐܲܪܥܵܐ.

ܠܵܐ ܙܕܸܥ ܡ̣ܢ ܓܹܐܖܹ̈ܐ ܕܣܵܛܵܢܵܐ         ܒܡܵܪܝܵܐ ܣܵܒܪܸܬ ܩܵܬ݉ܘܼܟ̣ ܢܵܛܪܵܢܵܐ

ܗ̇ܝܓܵܗ ܕܵܟ̣ܪܸܢ ܓܵܘ ܥܸܩܘܼܝܝܼ          ܕܡܵܪܝܵܐ ܨܒ̣ܵܐܘܿܬ ܒܸܬ ܬܲܓܒܸܪܝܼ

ܓܵܘ ܫܡܲܝܵܐ ܙܹܐ ܠܲܝܬ ܫܸܟ ܒܘܼܬ ܡܲܠܟܘܼܬܵܐ ܕܡܲܠܟܵܐ ܥܵܠܡܝܼܢܵܝܵܐ: ܟܠܵܝ ܟܹܐ ܢܵܦܠܝܼ ܩܲܕ݉ܡܘܼܗܝ ܘܣܵܓ̣ܕܝܼ ܐܸܠܹܗ. ܬܲܟܠܵܐ ܕܐܲܚܢܲܢ ܙܹܐ ܓ̰ܲܠܕܹܐ ܡܵܛܲܚ ܠܡܕܝܼܢ݉ܬܵܐ ܕܡܲܠܟܲܢ ܓܘܼܪܵܐ.

ܡܒܵܕܵܠ ܕܠܲܝܠܹܐ ܕܦܵܫܲܡܝ̈ܵܬܲܢ          ܦܨܵܚܵܐ ܘܫܠܵܡܵܐ ܒܸܬ ܝܲܗܒ̣ܸܠ ܠܲܢ

ܒܲܣ ܠܹܐ ܡܲܢܫܲܚ ܐܘܼܦ ܒܝܲܠܨܘܼ̈ܝܲܢ      ܕܡܵܪܝܵܐ ܨܒ̣ܵܐܘܿܬ ܝܼܠܹܗ ܡܲܠܟܲܢ.