ܠܡܪܝܐ ܐܝܩܪܐ ܕܫܡܘܗܝ (ܡܙܡܘܪܐ ܟܛ: 2)

ܐܝܼܩܵܪܵܐ ܕܡܵܪܝܵܐ ܒܸܩܝܵܡܵܐ ܝܠܹܗ ܡ̣ܢ ܟܝܵܢܘܼܗܝ ܘܡ̣ܢ ܦܘܼܠܚܵܢܘܼ̈ܗܝ. ܚܩܝܼܪܵܐ ܝܠܹܗ ܒܚܲܨܝܲܬܘܼܗܝ: ܣܵܒܵܒ ܕܡܸܠܝܵܐ ܝܠܹܗ ܡ̣ܢ ܟܠ ܡܸܢܕܝܼ ܩܲܕܝܼܫܵܐ ܘܛܵܒ̣ܵܐ ܘܫܲܦܝܼܪܵܐ. ܦܘܼܠܚܵܢܹ̈ܐ ܕܒܸܦܠܵܛܵܐ ܝܢܵܐ ܡ̣ܢ ܚܲܨܝܲܬܘܼܗܝ ܙܹܐ ܚܩܝܼܖܹ̈ܐ ܝܢܵܐ. ܐܝܼܢܵܐ ܠܵܐ ܐܲܚܟ̰ܝܼ ܒܸܢܝܼܲܬܘܼܗܝ ܝܠܵܗ̇ ܕܐܲܢܹܐ ܦܘܼܠܚܵܢܘܼ̈ܗܝ ܡܲܚܙܝܼ ܛܵܒ̣ܘܼܬܘܼܗܝ ܘܖ̈ܲܚܡܘܼܗܝ ܘܟܹܐܢܘܼܬܘܼܗܝ ܩܵܐ ܒܸܖ̈ܝܵܬܘܼܗܝ: ܐܝܼܢܵܐ ܟܹܐ ܒܵܥܹܐ ܕܐܘܼܦ ܗ̇ܘ ܐܝܼܩܵܪܵܐ ܕܙܘܼܘܸܓܵܐ ܝܠܹܗ ܥܲܡ ܒܸܖ̈ܝܘܼܗܝ ܟܠܹܗ ܦܵܐܸܫ ܝܘܼܗܒ̣ܵܐ ܩܵܬܘܼܗܝ ܒܢܲܦ̮ܫܘܼܗܝ. ܠܲܝܬ ܚܲܕ݉ ܡܸܢܕܝܼ ܒܓܵܢܲܢ ܕܒܝܼܘܼܗܝ ܫܲܒ̣ܗܸܪܲܚ: ܣܵܒܵܒ ܡܵܢܝܼ ܝܠܹܗ ܕܟܹܐ ܥܵܒ̣ܸܕ ܠܲܢ ܦܖ̈ܝܼܫܹܐ ܡ̣ܢ ܐ݉ܚܹܖ̈݉ܢܹܐ؟ ܘܡܘܼܕܝܼ ܐܝܼܬ ܠܲܢ ܕܠܹܐ ܝܘܲܚ ܩܘܼܒܠܘܼܗܝ ܡ̣ܢ ܐܲܠܵܗܵܐ ܕܟܠܵܗ̇ ܫܵܦܵܩܲܬ؟ ܒܲܣ ܟܡܵܐ ܗܸܫܝܵܪ ܘܵܓ̰ܸܒ ܝܼܠܵܗ̇ ܕܗܵܘܲܚ ܠܸܚܕܵܪܵܐ ܒܟܘܼܦܘܼܬܵܐ ܩܲܕ݉ܡ ܡܵܪܝܵܐ! ܟܠ ܥܕܵܢܵܐ ܕܚܲܩܪܲܚ ܠܓܵܢܲܢ: ܣܵܒܵܒ ܓܵܘ ܟܠܵܗ̇ ܒܪܝܼܬܵܐ ܐܲܚܟ̰ܝܼ ܚܲܕ݉ ܐܝܼܬܝܵܐ ܐܝܼܬ ܕܚܫܝܼܚܵܐ ܝܠܹܗ ܠܚܸܩܪܵܐ: ܡܵܪܘܿܡܘܼܗ̇ ܝܘܲܚ ܓܵܢܲܢ ܠܹܗܘܵܝܵܐ ܒܵܪܵܒܵܪ ܥܲܡ ܥܸܠܵܝܵܐ. ܠܵܚܘܿܡܬܵܐ ܝܠܵܗ̇ ܕܚܲܕ݉ ܪܹܓ̰ܒܵܐ: ܕܝܘܼܪܟ̣ܵܐ ܕܚܲܝܘܼ̈ܗܝ ܚܕܵܐ ܣܵܥܲܬ ܝܼܠܹܗ: ܚܵܩܸܪ ܓܵܢܘܼܗܝ ܠܥܸܠܸܠ ܡ̣ܢ ܗ̇ܘ ܫܸܡܫܵܐ ܕܒܫܚܘܼܢܝܘܼܗܝ ܚܵܡܘܿܝܹܐ ܝܠܹܗ ܚܲܝܘܼܬܵܐ ܕܗ̇ܘ ܪܸܓ̰ܒܵܐ؟ ܠܵܚܘܿܡܬܵܐ ܝܠܵܗ̇ ܕܦܹܚܵܪܵܐ ܡܵܪܸܡ ܓܵܢܘܼܗܝ ܥܲܠ ܓܵܒ̣ܠܵܢܘܼܗܝ؟ ܟܹܐ ܡܵܨܝܵܐ ܬܵܘܙ ܕܒܲܪܝܼܵܐ ܦܵܠܫܵܐ ܥܲܡ ܓܲܪܕܵܒܘܼܠܹܐ؟ ܝܲܢ ܢܵܛܘܿܦܝܵܬܹ̈ܐ ܕܐܹܘܩܝܵܢܘܿܣ ܡܵܪܡܝܼ ܓܵܢܵܝ ܥܲܠ ܒܘܼܪܵܢ؟ ܗܲܒ̣ܠܘܿܢ ܠܡܵܪܝܵܐ: ܝܵܐ ܙܲܕܝܼܩܹ̈ܐ: ܗܲܒ̣ܠܘܿܢ ܠܡܵܪܝܵܐ ܙܲܪܒ ܘܐܝܼܩܵܪܵܐ. ܗܲܒ̣ܠܘܿܢ ܐܸܠܹܗ ܐܝܼܩܵܪܵܐ ܕܫܸܡܘܼܗܝ. ܐܝܼܢܵܐ ܥܒ̣ܘܿܕ ܒܵܘܵܪ ܐܵܗܵܐ ܝܠܹܗ ܚܲܕ݉ ܡ̣ܢ ܡܸܢܕܝܼܵܢܹ̈ܐ ܒܘܼܫ ܟ̰ܵܬܘܿܢ ܕܟܪܸܣܛܝܵܢܵܐ ܓܵܪܵܓ ܝܵܠܸܦ ــ ܠܹܐܡܵܪܵܐ: ܠܵܐ ܐܸܠܲܢ: ܠܵܐ ܐܸܠܲܢ: ܠܫܸܡܘܼܟ̣ ܗܵܘܹܐ ܐܝܼܩܵܪܵܐ. ܐܵܗܵܐ ܝܠܵܗ̇ ܚܕܵܐ ܕܲܪܣ ܕܡܵܪܝܵܐ ܡܲܠܘܿܦܲܢ ܝܼܠܹܗ: ܘܪܵܒܵܐ ܓܵܗܹ̈ܐ ܡܲܠܘܿܦܘܼܗ̇ ܝܠܹܗ ܒܬܲܥܠܲܡܬܵܐ ܡܲܡܪܸܥܵܢܬܵܐ. ܟܪܸܣܛܝܵܢܵܐ ܐܸܢ ܓ̰ܲܪܸܒ ܠܹܥܒ̣ܵܕܵܐ ܚܲܕ݉ ܡܸܢܕܝܼ ܕܠܵܐ ܛܠܵܒܬܵܐ ܕܗܲܝܲܪܬܵܐ ܡ̣ܢ ܡܵܪܝܵܐ: ܓ̰ܲܠܕܹܐ ܒܸܬ ܝܵܠܸܦ ܠܹܐܡܵܪܵܐ: ܠܹܐ ܡܵܨܹܝܢ ܠܹܥܒ̣ܵܕܵܐ ܗܸܟ̃ ܡܸܢܕܝܼ. ܐܝܼܡܵܐ ܕܥܵܒ̣ܕܲܚ ܚܲܕ݉ ܡܸܢܕܝܼ ܕܫܵܦܸܪ ܠܡܵܪܝܵܐ: ܘܵܓ̰ܸܒ ܝܼܠܵܗ̇ ܕܪܲܦܲܚ ܢܸܒܦܵܖ̈ܲܢ ܩܲܕ݉ܡ ܐܲܩܠܘܼ̈ܗܝ: ܘܡܲܩܘܸܚܲܚ: ܠܵܐ ܐܵܢܵܐ: ܐܸܠܵܐ ܫܵܦܵܩܲܬ ܕܐܲܠܵܗܵܐ ܕܝܼܗ݉ܘܵܐ ܒܝܼܝܼ.