ܒܬ ܦܝܫܝ ܒܗܒ̣ܝ (ܐܫܥܝܐ ܢܐ: 5)

ܒܙܲܒ̣ܢܹ̈ܐ ܕܓ̰ܘܼܪܵܒܵܐ ܩܸܫܝܵܐ ܟܪܸܣܛܝܵܢܵܐ ܠܲܝܬ ܠܹܗ ܗܸܟ̃ ܡܸܢܕܝܼ ܓܵܘ ܕܘܼܢܝܹܐ ܕܥܲܠܘܼܗܝ ܣܵܢܸܕ: ܒܘܼܬ ܐܵܗܵܐ ܟܹܐ ܗܵܘܹܐ ܢܵܐܟ̰ܵܪܵܐ ܠܪܲܦܘܼܝܘܼܗ̇ ܓܵܢܘܼܗܝ ܥܲܠ ܡܵܪܝܵܐ ܒܢܲܦ̮ܫܘܼܗܝ. ܐܝܼܡܵܐ ܕܓܵܡܝܼܘܼܗܝ ܦܝܵܫܵܐ ܝܠܵܗ̇ ܛܪܝܼܦܬܵܐ ܒܒܘܼܪܵܢ: ܘܡ̣ܢ ܒܲܪܢܵܫܵܐ ܠܲܝܬ ܗܹܒ̣ܝܼ ܕܦܘܼܨܵܝܵܐ: ܓܵܪܵܓ ܒܨܸܦܝܘܼܬܵܐ ܘܒܬܲܡܵܡܲܬܘܼܬܵܐ ܣܵܦܹܐ ܠܵܗ̇ ܓܵܢܘܼܗܝ ܠܬܲܓܒܲܪܬܵܐ ܕܡܵܪܝܵܐ. ܗܵܘܝܵܐ ܒܪܝܼܟ̣ܬܵܐ ܗ̇ܝ ܒܘܼܪܵܢ ܕܡܵܚܝܵܐ ܠܹܗ ܐ݉ܢܵܫܵܐ ܥܲܠ ܚܲܕ݉ ܩܵܝܵܐ ܕܐܲܝܟ̣ ܗ̇ܘ! ܛܘܼܒ̣ܵܐ ܠܗ̇ܘ ܐ݉ܢܵܫܵܐ ܕܒܘܼܖ̈ܵܢܹܐ ܕܕܘܼܢܝܹܐ ܛܵܪܦܝܼ ܠܹܗ ܠܩܵܝܵܐ ܕܕܵܘܖܹ̈ܐ: ܘܠܗ̇ܘ ܒܢܲܦ̮ܫܘܼܗܝ! ܚܲܕ݉ܟܡܵܐ ܓܵܗܹ̈ܐ ܐܘܼܚܟ̰ܵܐ ܪܵܒܵܐ ܕܵܘܣܬܹ̈ܐ ܕܕܘܼܢܝܹܐ ܟܹܐ ܗܵܘܝܼ ܠܲܢ ܕܠܹܐ ܡܵܨܲܚ ܩܲܪܒܸܢܲܚ ܠܐܲܠܵܗܲܢ: ܐܝܼܢܵܐ ܐܝܼܡܵܐ ܕܗܵܘܲܚ ܐܘܼܚܟ̰ܵܐ ܡܸܣܟܹܢܹ̈ܐ: ܐܘܼܚܟ̰ܵܐ ܒܹܐ ܕܵܘܣܬܹ̈ܐ: ܐܘܼܚܟ̰ܵܐ ܙܲܒܘܼܢ ܕܠܲܝܬ ܕܘܼܟܬܵܐ ܐ݉ܚܹܪ݉ܬܵܐ ܕܡܵܚܲܚ ܚܵܨܵܐ ܒܝܼܘܼܗ̇: ܒܲܣܝܼܡܬܵܐ ܝܠܵܗ̇ ܕܪܵܚܛܲܚ ܓܵܘ ܕܖ̈ܲܥܢܵܢܹܐ ܕܒܵܒܲܢ ܫܡܲܝܵܢܵܝܵܐ ܘܦܵܝܫܲܚ ܚܦܝܼܩܹܐ ܬܵܡܵܐ! ܐܝܼܡܵܐ ܕܟܪܸܣܛܝܵܢܵܐ ܡܘܼܛܥܸܢܵܐ ܝܠܹܗ ܒܟܵܖ̈ܵܬܹܐ ܐܘܼܚܟ̰ܵܐ ܝܲܩܘܼܖܹ̈ܐ ܕܠܹܐ ܡܵܨܹܐ ܠܬܵܢܘܿܝܵܝ ܩܵܐ ܗܸܟ̃ ܚܲܕ݉ ܡܵܓܲܪ ܩܵܐ ܐܲܠܵܗܵܐ: ܠܵܚܘܿܡܬܵܐ ܝܠܵܗ̇ ܕܛܵܥܹܝܢ ܡܸܢܬܵܐ ܒܘܼܬ ܩܲܒܵܠܬܵܐ ܕܗܲܕܟ̣ܵܐ ܟܵܖ̈ܵܬܹܐ: ܣܵܒܵܒ ܗ̇ܝܓܵܗ ܙܵܘܕܵܐ ܒܸܬ ܝܵܠܸܦ ܒܘܼܬ ܐܵܓ̣ܵܝܘܼܗܝ ܡ̣ܢ ܕܒܟܠ ܥܕܵܢܵܐ ܐ݉ܚܹܪ݉ܬܵܐ. ܝܵܐ ܗܲܡܸܢܵܢܵܐ ܛܪܝܼܦܵܐ ܒܡܲܚܫܘܼܠܹ̈ܐ ܕܙܲܒ̣ܢܵܐ: ܛܥܘܿܢ ܡܸܢܬܵܐ ܒܘܼܬ ܗ̇ܝ ܒܘܼܪܵܢ ܕܠܲܒܘܼܠܘܼܟ̣ ܝܼܠܵܗ̇ ܠܟܸܣ ܒܵܒܘܼܟ̣. ܐܵܕܝܼܵܐ ܟܲܕ ܐܲܚܟ̰ܝܼ ܠܟܸܣ ܐܲܠܵܗܵܐ ܝܠܵܗ̇ ܗܹܒ̣ܝܼܘܼܟ̣: ܗ݉ܘܝܼ ܗܸܫܝܵܪ ܠܸܣܒܵܪܵܐ ܒܝܼܘܼܗܝ ܒܟܠܵܗ̇ ܚܵܛܸܪܓ̰ܲܡܥܘܼܬܵܐ. ܠܵܐ ܡܲܝܸܬ݉ܬ ܠܵܘܡܵܐ ܠܫܸܡܵܐ ܕܡܵܪܘܼܟ̣ ܘܐܵܓ̣ܵܝܘܼܟ̣ ܒܙܕܘܼܥܬܵܐ ܘܫܸܟ: ܐܸܠܵܐ ܗ݉ܘܝܼ ܚܲܝܠܵܢܵܐ ܒܗܲܝܡܵܢܘܼܬܵܐ: ܒܸܚܩܵܪܵܐ ܠܡܵܪܝܵܐ. ܡܲܚܙܝܼ ܩܵܐ ܕܘܼܢܝܹܐ ܕܐܲܠܵܗܘܼܟ̣ ܒܘܼܫ ܨܦܵܝܝܼ ܝܠܹܗ ܩܵܬܘܼܟ̣ ܡ̣ܢ ܪܸܒܘܼ ܕܥܵܠܡܹ̈ܐ. ܡܲܚܙܝܼ ܩܵܐ ܕܵܘܠܲܬܡܲܢܕܹ̈ܐ ܟܡܵܐ ܕܵܘܠܲܬܡܲܢܕ ܝܼܘܸܬ ܐܲܢ݉ܬ ܟܲܕ ܐܲܠܵܗܵܐ ܝܠܹܗ ܒܵܒܘܼܟ̣ ܘܗܲܝܸܪܵܢܘܼܟ̣. ܡܲܚܙܝܼ ܩܵܐ ܚܲܝܠܵܢܹ̈ܐ ܒܦܲܓ̣ܪܵܐ ܟܡܵܐ ܚܲܝܠܵܢܵܐ ܝܘܸܬ ܐܲܢ݉ܬ ܒܡܸܣܟܹܢܘܼܬܘܼܟ̣ ܟܲܕ ܥܲܠ ܕܖ̈ܲܥܢܵܢܹܐ ܐܵܒܵܕܝܼܢܵܝܹ̈ܐ ܣܢܝܼܕܵܐ ܝܘܸܬ. ܗ݉ܘܝܼ ܚܲܝܠܵܢܵܐ ܘܪܵܒܵܐ ܡܲܪܕܵܐ: ܗ̇ܝܓܵܗ ܒܝܵܩܝܼܢܘܼܬܵܐ ܐܲܠܵܗܵܐ ܕܫܡܲܝܵܐ ܒܸܬ ܚܵܩܸܪ ܓܵܢܘܼܗܝ ܒܙܲܒܘܼܒܘܼܬܘܼܟ̣: ܘܒܸܬ ܓܲܪܘܸܣ ܙܲܪܒܘܼܗܝ ܒܹܝܦܲܠܓܵܐ ܕܥܹܩܘܼܝܘܼܟ̣. ܪܘܼܚܵܐ ܕܩܘܼܕܫܵܐ ܝܲܗܒ̣ܸܠܘܼܟ̣ ܠܸܣܢܵܕܵܐ ܥܲܠ ܝܑܼܫܘܿܥ ܡܫܝܼܚܵܐ ܒܐܵܗܵܐ ܝܵܘܡܵܐ ܐ݉ܚܵܪܵܝܵܐ ܕܝܲܪܚܵܐ.