ܠܐܢܝ ܕܒܣܝܡܠܐ ܠܗ: ܘܐ݉ܬܝܠܗ݉ܘܢ ܠܟܣܠܗ (ܡܪܩܘܣ ܓ: 13)

ܪܵܒܵܐ ܓܵܢܵܬܹ̈ܐ ܒܹܐ ܚܡܵܠܬܵܐ ܟܹܐ ܛܲܪܛܸܡܝܼ ܘܩܵܒ̣ܠܝܼ ܕܠܹܐ ܝܢܵܐ ܦܝܵܫܵܐ ܩܸܪܝܹܐ ܠܕܵܖ̈ܵܓ̰ܹܐ ܖ̈ܵܡܹܐ ܕܚܸܠܡܲܬ: ܐܝܼܢܵܐ: ܩܵܪܝܵܢܵܐ ܐܲܢ݉ܬ ܚܕܝܼ: ܕܡܫܝܼܚܵܐ ܟܹܐ ܩܵܪܹܐ ܠܡ̇ܢ ܕܒܵܣܡܵܐ ܠܹܗ. ܐܸܢ ܗ̇ܘ ܓܲܒܹܐ ܠܝܼ ܠܹܗܘܵܝܵܐ ܚܲܕ݉ ܢܵܛܪܵܢܵܐ ܕܬܲܪܥܵܐ ܓܵܘ ܒܲܝܬܘܼܗܝ: ܐܵܢܵܐ ܒܚܵܕܘܼܬܵܐ ܒܸܬ ܚܵܩܪܸܢܹܗ ܒܘܼܬ ܫܵܦܵܩܲܬܘܼܗܝ ܕܒܸܫܒ̣ܵܩܵܐ ܝܠܹܗ ܕܗܵܘܹܐ ܠܝܼ ܚܲܕ݉ ܣܵܡܵܐ: ܟܠ ܕܵܐܟ̣ܝܼ ܕܗܵܘܹܐ: ܓܵܘ ܚܸܠܡܲܬܘܼܗܝ. ܩܪܵܝܬܵܐ ܕܖܹ̈ܓܵܘܵܬܹܐ ܕܡܫܝܼܚܵܐ ܡ̣ܢ ܪܵܘܡܵܐ ܟܹܐ ܐܵܬܝܵܐ. ܡܫܝܼܚܵܐ ܟܸܠܝܵܐ ܝܠܹܗ ܥܲܠ ܛܘܼܪܵܐ: ܕܵܝܸܡ ܠܥܸܠܸܠ ܡ̣ܢ ܕܘܼܢܝܹܐ ܒܩܲܕܝܼܫܘܼܬܵܐ: ܒܚܲܝܡܘܼܬܵܐ: ܒܚܘܼܒܵܐ: ܒܗܘܼܟܡܵܐ. ܐܵܢܝܼ ܕܩܵܪܹܐ ܠܗ݉ܘܿܢ ܘܵܓ̰ܸܒ ܝܼܠܵܗ̇ ܕܐܵܣܩܝܼ ܒܛܘܼܪܵܐ: ܩܲܪܒܸܢܝܼ ܒܘܼܫ ܙܵܘܕܵܐ ܠܪܵܡܘܼܬܘܼܗܝ ܒܚܝܵܝܬܵܐ ܒܫܵܘܬܵܦܘܼܬܵܐ ܕܵܝܸܡ ܥܲܡܘܼܗܝ. ܒܲܠܟܵܐ ܠܵܐ ܡܵܛܝܼ ܠܐܝܼܩܵܖܹ̈ܐ ܥܵܠܡܵܢܵܝܹ̈ܐ: ܝܲܢ ܩܵܢܝܼ ܪܹܫܵܝܘܼܬܵܐ ܒܝܘܼܠܦܵܢܹ̈ܐ: ܐܝܼܢܵܐ ܐܵܢܝܼ ܙܹܐ ܐܲܝܟ̣ ܡܘܼܫܹܐ: ܓܵܪܵܓ ܐܵܣܩܝܼ ܓܵܘ ܛܘܼܪܵܐ ܕܐܲܠܵܗܵܐ: ܘܗܵܘܝܵܐ ܠܗ݉ܘܿܢ ܨܵܘܗܒܲܬ ܥܲܡ ܐܲܠܵܗܵܐ ܠܵܐ ܡܸܬܚܲܙܝܵܢܵܐ: ܘܐܸܢ ܠܵܐ: ܠܹܐ ܦܵܝܫܝܼ ܡܘܼܚܫܸܚܹܐ ܠܡܲܫܚܘܼܕܹܐ ܐܹܘܲܢܓܵܠܝܘܿܢ ܕܫܠܵܡܵܐ. ܡܵܪܲܢ ܦܪܝܼܫ ܠܹܗ ܘܐ݉ܙܝܼܠ ܠܹܗ ܒܢܲܦ̮ܫܘܼܗܝ ܠܹܥܒ̣ܵܕܵܐ ܚܲܒ̣ܪܵܘܵܝܘܼܬܵܐ ܪܵܡܬܵܐ ܥܲܡ ܒܵܒܵܐ: ܐܘܼܦ ܐܲܚܢܲܢ ܠܵܙܸܡ ܝܼܠܵܗ̇ ܕܙܲܘܸܓܲܚ ܥܲܡ ܗ̇ܝ ܫܵܘܬܵܦܘܼܬܵܐ ܐܸܢ ܡܘܼܫܬܵܪܝܼ ܝܘܲܚ ܠܹܗܘܵܝܵܐ ܒܘܼܪܟܬܵܐ ܩܵܐ ܐ݉ܢܵܫܹ̈ܐ ܚܲܒ̣ܖ̈ܵܘܵܬܲܢ. ܠܹܐ ܝܠܵܗ̇ ܥܵܓ̰ܸܒܘܼܬܵܐ ܕܫܠܝܼܚܹ̈ܐ ܩܛܝܼܘܹ̈ܐ ܝܗ݉ܘܵܘ ܒܚܲܝܠܵܐ ܟܲܕ ܨܠܹܐ ܠܗ݉ܘܿܢ ܡ̣ܢ ܗ̇ܘ ܛܘܼܪܵܐ ܕܡܫܝܼܚܵܐ ܐ݉ܣܝܼܩܵܐ ܝܗ݉ܘܵܐ ܥܲܠܘܼܗܝ. ܒܐܵܗܵܐ ܡܵܘܪܹܫܵܐ ܓ̰ܲܪܒܲܚ ܠܹܐܣܵܩܵܐ ܥܲܠ ܛܘܼܪܵܐ ܕܫܵܘܬܵܦܘܼܬܵܐ ܐܲܠܵܗܵܝܬܵܐ: ܕܬܵܡܵܐ ܦܵܝܫܲܚ ܣܝܼܡܹܐ ܩܵܐ ܗ̇ܘ ܦܘܼܠܚܵܢܵܐ ܕܚܲܝ̈ܲܢ ܕܩܵܬܘܼܗܝ ܦܝܼܫ ܠܲܢ ܦܪܝܼܫܹܐ. ܐܸܕܝܘܿܡ ܫܒ̣ܘܿܩ ܠܵܐ ܚܵܙܲܚ ܦܵܬܵܐ ܕܒܲܪܢܵܫܵܐ ܗܲܠ ܕܚܸܙܝܹܐ ܝܘܲܚ ܠܦܵܬܵܐ ܕܡܫܝܼܚܵܐ. ܐܘܼܦ ܐܲܚܢܲܢ ܒܸܬ ܦܲܠܛܲܚ ܫܹܐܕܹ̈ܐ ܘܒܸܬ ܦܵܠܚܲܚ ܢܝܼܫܲܢܩܹ̈ܐ ܐܸܢ ܨܵܠܲܚ ܓܵܘ ܕܘܼܢܝܹܐ ܟܲܕ ܡܘܼܠܒ̣ܸܫܹ̈ܐ ܒܗ̇ܘ ܚܲܝܠܵܐ ܐܲܠܵܗܵܝܵܐ ܕܐܲܚܟ̰ܝܼ ܡܫܝܼܚܵܐ ܟܹܐ ܡܵܨܹܐ ܠܝܲܗܒ̣ܵܐ. ܠܲܝܬ ܦܵܝܕܵܐ ܕܐܵܙܲܠ݉ܚ ܠܦܠܵܫܵܐ ܕܡܵܪܝܵܐ ܗܲܠ ܕܦܝܼܫܹܐ ܝܘܲܚ ܟ̰ܘܼܟܒܸܢܹܐ ܒܟ̰ܲܟܹ̈ܐ ܫܡܲܝܵܢܵܝܹ̈ܐ. ܟ̰ܸܡ ܠܵܙܸܡ ܝܼܠܵܗ̇ ܕܚܵܙܲܚ ܠܡܫܝܼܚܵܐ ܐܵܕܝܼܵܐ ܩܲܕ݉ܡ ܬܪܘܿܢܘܿܣ ܕܫܵܦܵܩܲܬ ܡ̣ܢ ܩܲܕ݉ܡ ܕܦܵܠܛܲܚ ܡ̣ܢ ܟܘܼܚܬܲܢ.